Rig Veda Book 8: Hymn 45

ā ghā ye aghnimindhate stṛṇanti barhirānuṣak | yeṣāmindro yuvā sakhā || bṛhannididhma eṣāṃ bhūri śastaṃ pṛthuḥ svaruḥ | yeṣāmindro yuvā sakhā || ayuddha id yudhā vṛtaṃ śūra ājati satvabhiḥ | yeṣāmindro yuvā sakhā || ā bundaṃ vṛtrahā dade jātaḥ pṛchad vi mātaram | ka ughrāḥ ke ha śṛṇvire || prati tvā śavasī vadad ghirāvapso na yodhiṣat | yaste śatrutvamācake || uta tvaṃ maghavañchṛṇu yaste vaṣṭi vavakṣi tat | yad vīḷayāsi vīḷu tat || yadājiṃ yātyājikṛdindraḥ svaśvayurupa | rathītamo rathīnām || vi ṣu viśvā abhiyujo vajrin viṣvagh yathā vṛha | bhavā naḥ suśravastamaḥ || asmākaṃ su rathaṃ pura indraḥ kṛṇotu sātaye | na yaṃ dhūrvanti dhūrtayaḥ || vṛjyāma te pari dviṣo.araṃ te śakra dāvane | ghamemedindraghomataḥ || śanaiścid yanto adrivo.aśvāvantaḥ śataghvinaḥ | vivakṣaṇā anehasaḥ || ūrdhvā hi te dive-dive sahasrā sūnṛtā śatā | jaritribhyovimaṃhate || vidmā hi tvā dhanaṃjayamindra dṛḷhā cidārujam | ādāriṇaṃ yathā ghayam || kakuhaṃ cit tvā kave mandantu dhṛṣṇavindavaḥ | ā tvā paṇiṃ yadīmahe || yaste revānadāśuriḥ pramamarṣa maghattaye | tasya no veda ā bhara || ima u tvā vi cakṣate sakhāya indra sominaḥ | puṣṭāvanto yathā paśum || uta tvābadhiraṃ vayaṃ śrutkarṇaṃ santamūtaye | dūrādiha havāmahe || yacchuśrūyā imaṃ havaṃ durmarṣaṃ cakriyā uta | bhaverāpirno antamaḥ || yaccid dhi te api vyathirjaghanvāṃso amanmahi | ghodā idindra bodhi naḥ || ā tvā rambhaṃ na jivrayo rarabhmā śavasas pate |

ā tvā rambhaṃ na jivrayo rarabhmā śavasas pate | uśmasi tvā sadhastha ā || stotramindrāya ghāyata purunṛmṇāya satvane | nakiryaṃ vṛṇvate yudhi || abhi tvā vṛṣabhā sute sutaṃ sṛjāmi pītaye | tṛmpā vyaśnuhī madam || mā tvā mūrā aviṣyavo mopahasvāna ā dabhan | mākīṃ brahmadviṣo vanaḥ || iha tvā ghoparīṇasā mahe mandantu rādhase | saro ghauro yathā piba || yā vṛtrahā parāvati sanā navā ca cucyuve | tā saṃsatsupra vocata || apibat kadruvaḥ sutamindraḥ sahasrabāhve | atrādediṣṭa pauṃsyam || satyaṃ tat turvaśe yadau vidāno ahnavāyyam | vyānaṭ turvaṇe śami || taraṇiṃ vo janānāṃ tradaṃ vājasya ghomataḥ | samānamu pra śaṃsiṣam || ṛbhukṣaṇaṃ na vartava uktheṣu tughryāvṛdham | indraṃ somesacā sute || yaḥ kṛntadid vi yonyaṃ triśokāya ghiriṃ pṛthum | ghobhyo ghātuṃ niretave || yad dadhiṣe manasyasi mandānaḥ prediyakṣasi | mā tat karindra mṛḷaya || dabhraṃ cid dhi tvāvataḥ kṛtaṃ śṛṇve adhi kṣami | jighātvindra te manaḥ || tavedu tāḥ sukīrtayo.asannuta praśastayaḥ | yadindra mṛḷayāsi naḥ || mā na ekasminnāghasi mā dvayoruta triṣu | vadhīrmā śūra bhūriṣu || bibhayā hi tvāvata ughrādabhiprabhaṅghiṇaḥ | dasmādahamṛtīṣahaḥ || mā sakhyuḥ śūnamā vide mā putrasya prabhūvaso | āvṛtvad bhūtu te manaḥ || ko nu maryā amithitaḥ sakhā sakhāyamabravīt | jahā ko asmadīṣate || evāre vṛṣabhā sute.asinvan bhūryāvayaḥ | śvaghnīva nivatā caran || ā ta etā vacoyujā harī ghṛbhṇe sumadrathā | yadīṃ brahmabhya id dadaḥ ||

bhindhi viśvā apa dviṣaḥ pari bādho jahī mṛdhaḥ | vasuspārhaṃ tadā bhara || yad vīḷāvindra yat sthire yat parśāne parābhṛtam | vasuspārhaṃ tadā bhara || yasya te viśvamānuṣo bhūrerdattasya vedati | vasu spārhaṃ tadā bhara ||